Навукоўцы з Краснаярскага дзяржаўнага аграрнага ўніверсітэта вывелі новы гатунак бульбы, адаптаваны да суровага клімату. Пра гэта паведамляе ТАСС са спасылкай на кіраўніка Цэнтра селекцыі і насенняводства Краснаярскага дзяржаўнага аграрнага ўніверсітэта Андрэя Чуракова.
«Нашы навукоўцы ўпершыню вывелі гатунак бульбы, які лёгка пераносіць зменлівасць сібірскага клімату, мае прыемныя смакавыя якасці і прыгожы знешні выгляд, што важна пры рэалізацыі прадукту. Над селекцыяй гэтага гатунку мы працавалі каля шасці гадоў. І вось мы завяршылі ўсе выпрабаванні і перадалі ўзоры ў Дзяржаўную камісію па сортавыпрабаванні сельскагаспадарчых культур пры Міністэрстве сельскай гаспадаркі. Як толькі наша бульба пройдзе ўсе праверкі, фермеры змогуць яе выкарыстоўваць».
Андрэй Чуракоў – начальнік Цэнтра селекцыі і насенняводства Краснаярскага дзяржаўнага аграрнага ўніверсітэта.
Сёння фермеры патрабуюць ад селекцыянераў вывесці гатункі бульбы, якія адпавядаюць новым патрабаванням. Абапірацца толькі на прынцып раяніравання гатункаў (дзе рэкамендаваныя пэўныя гатункі бульбы для рэгіёну) ужо недастаткова. Паводле слоў Чуракова, аграрыям патрэбны прадукт, які будзе мець прыемны знешні выгляд, каб гародніна лепш паступала ў сеткавы продаж.
Новы гатунак, выведзены краснаярскімі навукоўцамі, атрымаў назву «Акрукс» у гонар самай яркай зоркі ў сузор'і Паўднёвага Крыжа.
Таксама ў распрацоўцы краснаярскіх навукоўцаў знаходзіцца яшчэ адзін гатунак бульбы. Яго могуць выкарыстоўваць вытворцы для апрацоўкі прадукту: вырабу чыпсаў, шматкоў, крухмалу. Першыя ўзоры гэтага гатунку вучоныя павінны перадаць у дзяржаўную камісію ў Мінсельгасхарч да 2025 года.
Краснаярскі дзяржаўны аграрны універсітэт займаецца селекцыяй бульбы з 1970-х гадоў. За гэты час было выведзена каля 40 розных гатункаў. Аднак яны не адпавядалі ўсім сучасным патрабаванням спажыўцоў і вытворцаў. У 2016 годзе ва ўніверсітэце змянілася канцэпцыя адборачнай работы і абноўлены зыходны матэрыял.